০৩/০৮/২০১৬ তাৰিখে জনসাধাৰণ কাকতত প্রকাশিত

ভার্চুৱেল পৃথিৱী আৰু আমি

টুইটাৰ,ইয়াহু,জিমেইল,হোৱাটচএপ,ফে'চবুকৰ আদিৰ দৰে চ'ছিয়েল নেটৱৰ্কিং চাইটসমূহৰ বৰ্তমান জনসমাজত অত্যাধিক জনপ্ৰিয় হৈ পৰিছে । বিদেশত থকা আত্মীয়,দূৰ-দূৰণিত থকা সহপাঠী বন্ধু-বান্ধৱী নাইবা অপৰিচিত ব্যক্তিৰ সৈতে বন্ধুত্ব গঢ়ি অতি সহজ আৰু কম খৰচতে সু-সম্পৰ্ক ৰক্ষাৰ ক্ষেত্ৰত এনে চ'ছিয়েল নেটৱৰ্কিং চাইটসমূহে বিশেষ ভুমিকা পালন কৰি আহিছে । জনপ্রিয়তাৰ শীর্ষত থকা ফে'চবুকৰ দৰে চ'ছিয়লে নেটৱর্কিং চাইটে সমাজত বাস কৰা প্রতিজন মানুহকে নিজৰ মনৰ ভাৱ প্রকাশ কৰিবলৈ এখন মঞ্চও দিছে । সেইদৰে যাৰ যিদৰে মন গৈছে নিজৰ অনুভৱবোৰ এই মঞ্চত প্রকাশ কৰিও আহিছে । বিভিন্নজনে ইয়াতে নিৰৱে সাহিত্যৰ চর্চা কৰিছে, বিভিন্নজনে আকৌ সেই সাহিত্যৰ সোৱাদ লৈছে ।কোনোবাই সমাজৰ সমস্যাৰ যদি আলোচনা কৰিছে আন কোনোবাই সেই সমস্যা সমাধানৰ উপায় আগবঢ়াইছে । “কথাৰ মূৰত বঁটা পায় কথাৰ মূৰত গতা খায় "-প্ৰবচনশাৰীৰ বাবে এই মঞ্চতে কোনোবাই কিছুমানৰ কথা নাইবা মন্তব্যকলৈ বিতর্কৰো সৃষ্টি কৰে।

এক অপ্রিয় সত্য এই যে, বহুসময়ত কিছুমান ব্যক্তিয়ে ইনবক্সত হোৱাই নোহোৱাই অনর্থক কিছুমান প্রশ্ন সুধি বিৰক্তি দিয়ে অথচ সেই প্রশ্নোত্তৰবোৰ ব্যক্তিজনৰ বাবে কোনো প্রয়োজনীয়ই নহয় । ব্যক্তিগতভাৱে আমিও বহুবাৰ এনে সমস্যাৰ সন্মুখীন হৈছো। কেতিয়াবা তেওঁলোকৰ বার্তাসমূ্হ খুলি নেচালে নাইবা চোৱাৰ পিছত উত্তৰ দিয়াত পলম হ'লে পুণৰ আকৌ দেখিও কিয় উত্তৰ দিয়া নাই ,কিয় চোৱা নাই ইত্যাদি ধৰণেৰে অনর্থক প্রশ্ন কিছুমানৰ অৱতাৰণা কৰে । বন্ধুত্বসুলভ সুসম্পর্ক

গঢ়লৈ উঠাৰ পৰিবর্তে যে এক তিক্ততাৰ সম্পর্কইহে ব্যতিবস্ত কৰি তোলে ।

এতিয়া প্রশ্ন হ'ল ,এনে কৰাটো উচিত নে? এনে কৰাৰ যুক্তি কিবা আছে নে ? বর্তমান সময়ত নিজৰ পিতৃ-মাতৃ, বাই-ভনী নতুবা ভাই-ককাই আদিৰ দৰে পাৰিবাৰিক সম্পর্কবোৰ বজাই ৰাখিবলৈ আজিৰ মানুহৰ বাবে জটিল হৈ পৰিছে তেনেস্থলত মোৰ বোধেৰে ফে'চবুক,টুইটাৰ আদিৰ দৰে ভার্চুৱেল পৃথিৱীখনৰ পৰা সেই আশা কৰা ভুল।ভার্চুৱেল পৃথিৱীখনত নিজৰ ধুনীয়া ফটো ভাগবতৰা কৰি খন্তেকৰ বাবে সুখ বুটলিব পাৰিলেও সিয়েই আমাৰ জীৱনৰ বাবে সুখৰ পৰিভাষা হ'ব নোৱাৰে , কিছুসময়ৰ বাবে ই আমাৰ নিসংগতা দূৱ কৰিব পাৰিলেও আমাৰ সংগী হ'ব নোৱাৰে ।ভার্চুৱেল পৃথিৱীখন খন্তেক সময়ৰ বাবে আমাৰ জীৱনৰ অংগ হ'ব পাৰে কিন্তু সিয়েই আমাৰ জীৱন হ'ব নোৱাৰে ।বিজ্ঞান আৰু প্ৰযুক্তিৰ অনবদ্য অৱদান, এক কথাত উত্তম চিন্তাৰ ফচল এই নেটৱৰ্কিং চাইটক মানুহে কিদৰে ব্যৱহাৰকৰে সেইটোহে বর্তমান ডাঙৰ কথা । ভাল কামৰ ফল সদায় ভাল হয় । উত্তম চিন্তাধাৰাৰে ইয়াৰ সদ প্ৰয়োগ কৰিলে সমাজৰ উপকাৰ হ'ব । তাকে নকৰি যদি নিকৃষ্ট তথা অযথা চিন্তাৰে এনে বহুমূলীযা অৱদানৰ অপপ্ৰয়োগ কৰে তেন্তে সমাজত ই এক ভয়ংকৰ ব্যাধিৰহে সৃষ্টি কৰিব ।********