ভাষাৰ বিকৃতকৰণ
ভাষা এটাই বিৱর্তনৰ মাজেদি আহিহে একোটা ৰূপ পৰিগ্রহ কৰে ।বর্তমান অসমীয়াসকলৰ বিশেষকৈ নতুন প্রজন্মৰ মাজত অসমীয়া ভাষাটোৱে আহি যিটো ৰূপ লৈছে, বিৱর্তনৰ পথত অসমীয়া ভাষাই সেই ৰূপ নল'লেই ৰক্ষা । মোবাইল ফোনত চর্ট মেচেজিং চার্ভিচ ,হোৱাটচএপ আদি ব্যৱহাৰ ক'ৰোতে ,কম পইচাৰ লগতে কম সময় ব্যয় কৰিবলৈ যাওঁতে যিমান পাৰি চুটিকৈ কম শব্দ প্রয়োগ কৰি লিখিব লগা হয় । সময়ৰ লগে লগে এনে কৰাটো অভ্যাসত এনেভাৱে পৰিণত হ'বলৈ ধৰিল যে বর্তমান অনুভৱ কৰোঁ তেনে কৰিবলৈ যাওঁতেই যেন আমি অসমীয়াই মৌখিকভাৱেও অসমীয়া কথোপকথনত বিভক্তিৰ ব্যৱহাৰ কৰিবলৈ এৰি দিছোঁ । বিভিন্ন সময়ত অসমীয়া ব্যক্তিগত চেনেলবিলাকতে অসমীয়া ভাষাত বাতৰিৰ ব্যাখ্যা শুনি হতবাক হওঁ। শব্দৰ উচ্চাৰণ নজনাটো কোনো ডাঙৰ কথা নহয়
কিন্তু নজনা কথাটো যে শুদ্ধকৈ শিকিলৈ ক'ব লাগে সেই সজাগতা নথকাটোহে দুখৰ বিষয়। কিছুমান অসমীয়া নতুন প্রজন্মৰ শিল্পী সকলৰ সাক্ষাৎকাৰৰ অনুষ্ঠানো বহুসময়ত উপভোগ কৰিছোঁ। কিন্তু কিছুমান অসমীয়া শিল্পীৰ কথা শুনি বিৰক্তি অনুভৱ কৰোঁ । অসমীয়াত নকৈ যেন আন ভাষাতহে কথা কৈছে তেনেকুৱা এক অনুভৱ হয়। শিল্প সাধনাৰে অসমত জনপ্রিয়তা অর্জন কৰাটো ভাল কথা কিন্তু তাৰ লগে লগে অসমীয়া হিচাপে নিজৰ মাতৃভাষাটো ভালকৈ ক'ব পৰাটো গৌৰৱৰহে কথা ।অসমীয়া ভাষাৰ কথোপকথনত ষ্টাইল কিম্বা ঢং যিহতেই নহওঁক লাগিলে চ' নাইবা ত' ৰ ব্যৱহাৰ কৰাৰ যেন তুমুল প্ৰতিযোগিতেহে চলিছে ।
অসমীয়া ভাষাত ব্যৱহৃত সেয়ে, সেইকাৰণে,গতিকে আদি শব্দ ক'বলৈ এলাহ কৰি ইংৰাজী চ' (so)ৰ আশ্রয় লোৱাবর্তমান প্রায়ে দেখিবলৈ পোৱা যায় । সেইদৰে আকৌ অর্থহীনভাৱে তেতিয়া শব্দটোৰ ঠাইত ত' শব্দৰ প্রয়োগও লক্ষ্যণীয়। এনেকৈ অসংযতভাৱে কৰা মন্তব্য নাইবা কথা-বতৰা আমাৰ অসমবাসী ৰাইজে নিশ্চয় শুনি আহিছে । উঠি অহা চামে এইবিলাককে অনুকৰণ কৰিবলৈ ল'ব সেয়ে এইক্ষেত্রত নিতান্তই সজাগতা অৱলম্বণ কৰা উচিত ।শিল্পী-সাহিত্যিকসকলৰ লগতে অসমৰ সাধাৰণ ৰাইজেও বিষয়টোত বিশেষভাৱে গুৰুত্ব আৰূপ কৰিব লাগে ।কথা কওঁতে নিজেও সজাগ হোৱাৰ লগতে কাৰোবাৰ এনেধৰণৰ কথোপকথন শুনিলে বিনম্রতাৰে শুদ্ধ ৰূপটো যাতে শিকাই দিয়ে সকলোৰে প্রতি তাৰ সাদৰ অনুৰোধ জনাইছোঁ । *****
No comments:
Post a Comment