ফিলিত ফুলৰ প্রদর্শনী আৰু ডিচি ত ফুলৰ উৎসৱ
বসন্তকালত আমেৰিকাৰ পাতবিহীন গছবিলাক বিবিধ ৰঙৰ ফুলেৰে মনোমোহা হৈ
উঠে ।বিশেষকৈ পথৰ দাঁতিত ফুলি উঠা গোলপীয়া ,বগা ছেৰী ফুলৰ সৌন্দর্যই সকলোকে মোহাচ্ছন্ন কৰি তোলে ।যেনিয়েই চাওঁ তেনিয়েই বিবিধ ৰঙী ফুলৰ
আকর্ষণ।বসন্তকালত ফুলৰ উৎসৱ, প্রদর্শনী আদিবোৰে আমেৰিকাৰ অন্যতম আকৰ্ষণ ।
ফিলি অর্থাৎ পেনচিলভেনিয়াৰ ফিলাডেলফিয়াত থকা পেনচিলভেনিয়া কনভেন্টচন হলত আয়োজন কৰা হয় বিশ্বৰ সর্ববৃহৎ আন্তৰ্দ্বাৰ ফুলৰ প্রদর্শনীখন ।এইবাৰ ১১ মার্চৰ পৰা ১৯ মার্চলৈকে অনুষ্ঠিত কৰা প্রদর্শনীখন অন্তিম দিনা চাবলৈ গ'লো ।প্রদর্শণীত প্রাপ্তবয়স্কৰ কাৰণে প্রৱেশ মূল্য ৩৫ ডলাৰ আছিল ।ভাৰতীয় টকাৰ হিচাপত প্রায় ২২৮৩ টকা ।
সেইদৰে পঢ়ি থকা ছাত্রৰ বাবে ২২ ডলাৰ হোৱাৰ বিপৰীতে সৰু ল'ৰা -ছোৱালীৰ বাবে ১২ ডলাৰ আছিল ।প্রতিবছৰে প্রদর্শনীত একোটা নির্দিষ্ট অফিচিয়েল থিম সংযুক্ত কৰা হয় ।এইবাৰ আছিল মিচিগানৰ হলেণ্ড চিটি। টিউলিপ হ'ল প্রদর্শনীৰ মূখ্য আকর্ষণ। সকলো ফালে কেৱল চকু জুৰোৱা সৌন্দর্য ।ৰঙা,বগা,নীলা,,হালধীয়া,সুমথিৰা আদি বিবিধ ৰঙৰ টিউলিপৰ সমাহাৰ ।
টিউলিপৰ লগতে বিবিধ ৰঙৰ গোলাপ ফুলও দেখা পালো ।প্রথমবাৰৰ বাবে দেখিলো নার্চিচাছ ফুল ।প্রদর্শণীৰ ফুলবিলাকৰ মাজতে "ভোডো লিলি বুলি" এজোপা গছত স্মেল মি বুলি লিখি থোৱা দেখিলো ।পিছে ধুনীয়া গোন্ধ বুলি নাকটো আগবঢ়াই দিলে মৰি যাওঁ যেন লাগিব । অত্যন্ত উৎকট লেতেৰা গোন্ধ ।একেবাৰে ঘৰৰ ভিতৰত চিকা মৰিলে যি গোন্ধ সেইটো ।সকলো সুগন্ধিক ভোডো লিলিৰ দূর্গন্ধই চেৰ পেলাই দিব ।
ফুলৰ প্রদর্শণীৰ লগতে তাত বিবিধ সামগ্রীৰ বিপনীৰে মেলা এখনও বহিছিল ।বিপনীবিলাকত ঘাইকৈ আছিল হাতেৰে বনোৱা বিভিন্ন গহনা,কেন্টালোপ ফলৰ গুঠিৰে বনোৱা ব্রেচলেট, নেকলেচ,কাঠৰ চামুচ হেতা, পেইন্টিং, সজোৱা বস্তু ইত্যাদি ।কিছুমান বিপনীত ফুলও বিক্রী কৰিছিল ।প্রতি থোপাত গোলাপৰ মূল্য আছিল ১০ ডলাৰ । ফুলৰ প্রদর্শনী চাবলৈ অহা গাড়ীবিলাকৰ পার্কিংৰ বাবদ দিব লগা হৈছিল প্রতি ঘন্টাত ৮ ডলাৰকৈ ।প্রদর্শনীৰ ভিতৰত আমাৰ প্রায় চাৰে তিনি ঘন্টা হ'ল ।সেয়ে আমি সর্বমুঠ ৩২ ডলাৰ পৰিশোধ কৰিব লগা হ'ল ।
সেইয়া যি নহওঁক প্রথমবাৰৰ বাবে ফুলৰ প্রদর্শনী চাবলৈ পালো । সঁচাই ভাল লাগিছিল । কাৰণ বিশ্বৰ সর্ববৃহৎ সেই আন্তর্দ্বাৰ ফুলৰ প্রদর্শনীখন ১৮২৯ চনৰ পৰাই চলি আহিছে ।
আমেৰিকা যুক্তৰাষ্ট্রই বসন্তৰ আৰম্ভণিতে জাপানে দিয়া চেৰী ফুলৰ উপহাৰেৰে বছৰি পালন কৰে আন এটি বিশেষ উৎসৱ । মনোমোহা চেৰী ফুলক কেন্দ্ৰ কৰা উদযাপন কৰা এই উৎসৱক কোৱা হয় নেচনেল চেৰী ব্ল'জম ফেষ্টিভেল। এই উৎসৱ আমেৰিকাৰ ৱাশ্বিংটন ডি চি ত প্ৰতিবছৰৰ আয়োজন কৰা হয়। এইবছৰ ১৫ মাৰ্চৰ পৰা আৰম্ভ হোৱা এই নেচনেল চেৰী ব্লজম ফেষ্টিভেল ১৬ এপ্ৰিল পৰ্যন্ত অব্যাহত থাকে।
১৯১২ চনত জাপানৰ টকিঅ' চিটিৰ তেতিয়াৰ মেয়ৰ য়ুকিঅ' অজাকিয়ে আমেৰিকাৰ ৱাশ্চিংটন চহৰক জাপানৰ বিখ্যাত চেৰী ফুলৰ গছ উপহাৰ হিছাপে দিছিল ।দুখন দেশৰ বন্ধুত্বৰ সাক্ষী হিছাপে বাঢ়ি যোৱা আৰু বগা-গুলপীয়া ৰঙেৰে ফুলি উঠা ৩৭৫০ জোপা চেৰী ফুল গছৰ সৌন্দৰ্যই প্ৰতিবছৰে দেশী-বিদেশী পৰ্যটকসকলক আকৰ্ষণ কৰি আহিছে ।
চেৰী ফুলৰ লগতে বিভিন্ন ৰঙৰ বেলুন ,সুসজ্জিত নৌকা ,পেৰেড ,কাইট ফেষ্টিভেল (চিলা উৰুৱাওৱা উৎসৱ) ,বিভিন্ন ৰাষ্ট্ৰৰ বেণ্ড পাৰ্টি আদিয়ে প্রতিবছৰে এই উৎসৱটিক অনন্য মাত্ৰা প্ৰদান কৰি আহিছে । আমেৰিকা-জাপানৰ দ্বিতীয় বিশ্বযু্দ্ধৰ ভয়াবহ ইতিহাসক উফৰাই জাপানৰ সৈতে আমেৰিকা যুক্তৰাষ্ট্ৰৰ বন্ধুত্বৰ মধুৰ সম্পৰ্ক বজাই ৰখাটোৱেই এই উৎসৱৰ প্ৰধান উদ্দেশ্য ।এই উৎসৱৰ লগত সংগতি ৰাখি চুচি, শ্বেক আদিকে ধৰি বিবিধ খাদ্যসম্ভাৰেৰে এখনি মেলাও হয় । ইয়াৰোপৰি চিত্ৰকলাৰ প্ৰদৰ্শনী ,ফ্যেশ্বন শ্ব' আদিবোৰো আয়োজন কৰা হয় । বছৰি প্ৰায় ৭০ হাজাৰতকৈ অধিক লোকে এই উৎসৱলৈ আহি চেৰীফুলৰ সৌন্দৰ্য উপভোগ কৰে ।
বসন্তৰ মনোমোহা ক্ষণত পেনচিলভেনিয়াৰ লংগ ওড গাৰ্ডেনেও আমেৰিকাবাসীক আকর্ষণ কৰি আহিছে ।লংগ ওডৰ মুখ্য আকর্ষণেই হৈছে বিভিন্ন ৰঙৰ টিউলিপ
ফুল,ডগওড, উইষ্টিলিয়া, মেগনোলিয়া, আজেলিয়া আদি ।লংগ ওড গার্ডেনৰ ভিতৰ ভাগত বিভিন্ন প্রজাতিৰ অর্কিড সংৰক্ষণ কৰি আকর্ষণীয় ৰূপত সেইবোৰ সজাই ৰখা
হৈছে ।
বসন্ত কালত পর্যটকৰ বাবে আমেৰিকা যুক্তৰাষ্ট্রৰ আনবিলাক আকর্ষণ হ'ল- পর্টলেণ্ডৰ ৰ'জ ফেষ্টিভেল,নর্থ-কেৰোলিনাৰ বিল্টম'ৰ ব্লোম, মিচিগান হলেণ্ডৰ টিউলিপ টাইম, টেক্সাচৰ ডালাচ ব্লোম,মিজৌৰিৰ ডগওড আজালিয়া ফেষ্টিভেল ইত্যাদি ।
মানসী বৰা ।
